SURƏSİNİN
ŞƏRHİ
ﭑ ﭒ ﭓ ﭔ
Mərhəmətli və Rəhimli Allahın adı
ilə!
ﭑ ﭒ ﭓ ﭔ ﭕ ﭖ ﭗ ﭘﭙ ﭚ ﭛ ﭜ ﭝﭞ ﭟ ﭠ ﭡ ﭢ ﭣ ﭤ
(64. 1)
“Allahı göydəkilər də, yerdəkilər də şərəfləndirirlər. Səltənət Onundur və
həmd də Ona məxsusdur! O, hər şeyə qadirdir».
Bu surənin
ilk ayələrində Kainatın Xaliqinin çoxlu əzəmətli sifətlərindən bəhs edilir.
Onlarda Onun ilahi kamilliyi və Onun var-dövlətinin həddi-hüdudunun
olmamazlığı xüsusilə vurğulanır. Bütün məxluqlar Ona möhtacdırlar, göylərin
və yerin sakinləri Ona həmd edirlər, hakimiyyət və səltənət bütünlüklə
yalnız Ona məxsusdur və heç bir məxluq Onun hökümranlığı altından çıxa bilməz.
Kamil sifətlərə, Kainatı xəlq etdiyinə, hikmətli qanunlar yaratdığına,
bolluq nazil etdiyinə görə yalnız Ona həmd edilməlidir. Rəbb fövqəlqüdrətlidir
və bütün varlıqlar Onun iradəsinə tabedirlər. Onun yarada bilməyəcəyi bir şey
yoxdur.
ﭥ ﭦ ﭧ ﭨ ﭩ ﭪ ﭫﭬ ﭭ ﭮ ﭯ ﭰ ﭱ
(64. 2) “O –
sizi Xəlqedəndir. Sizdən kafirlər də var, möminlər də. Allah nə etdiyinizi
görür”.
Fövqəluca xəbər
verir ki, O (Pak və Müqəddəs), qullarını yaradaraq, onları ya mömin, ya da
kafir etmişdir. İman da, imansızlıq da Allahın qədərindən və qismətindən
asılıdır. O (Pak və Müqəddəs), hər şeyin məhz belə olmasını istəmişdir. Lakin
bununla yanaşı insanlara iradə və xeyir ilə şər arasında seçmək
qabiliyyəti[1] vermiş və
bunun sayəsində də insan Allahın hökm və qadağalarına tabe olub-olmamağı sərbəst
həll edir. Allah onun seçiminə nəzarət etmir.
Bundan əvvəlki
ayələrdə Allah, hökümlərə və qadağalara görə məsuliyyət daşıyacaq insanı xəlq
etdiyini bildirmişdi və sonra digər məxluqları haqqında xəbər verərək, belə
buyurur:
ﭲ ﭳ ﭴ ﭵ ﭶ ﭷ ﭸﭹ ﭺ ﭻ ﭼ
(64. 3) “O,
göyləri və yeri haqq xatirinə yaratdı, sizə sima verib, surətinizi gözəl etdi.
Qayıdış Ona olacaqdır”.
O (Pak və
Müqəddəs), göyləri, yeri və onların sakinlərini haqq xatirinə, yəni, ilahi
müdrikliyinə uyğun olaraq və qoyduğu məqsədə nail olmaq naminə xəlq etmişdir. O
(Pak və Müqəddəs), məxluqlarına surət vermiş və bu surəti gözəl yaratmışdır.
Fövqəluca buyurur: “Biz insanı ən gözəl surətdə xəlq etdik” (Tin,
95/4). Buna görə, Allahın xəlq etdiyi bütün məxluqlar içində insan ən gözəl və
cazibədar simaya malikdir. Qiyamət günü isə, o, Allahın yanına qayıtmalıdır
və O (Pak və Müqəddəs), onun imanına və ya kafirliyinə uyğun olaraq ona əvəz
verəcək və soruşacaq ki, o, Onun dünyada ona verdiyi nemətlərə və göstərdiyi
mərhəmətinə görə minnətdarlığını bildirib, şükür etmişdirmi?
(64. 4) “O,
göylərdə və yerdə olanları da bilir və sizin nəyi gizlətdiyinizi və nəyi
aşkar etdiyinizi də bilir. Allah köksdəkiləri də Biləndir».
Allah Özünün
hər şeyi əhatə edən elmindən xəbər verir və onun sayəsində O (Pak və Müqəddəs),
bütün gizli və aşkarda olan hər şeyi bilir. O (Pak və Müqəddəs), sizin gizlətdiyinizi
də, bəyan etdiklərinizi də bilir, gizli saxladığınız yaxşı niyyətlərinizdən
və yaramaz ideyalarınızdan, xeyirxah niyyətlərinizdən və pozğun cəhdlərinizdən
xəbərdardır. Ürəkdə gizli saxlanan hər şey Ona agahdır və buna görə hər bir
ağıllı və şüurlu insan öz qəlbini yaramaz xislətdən qorumağa mütləq səy
göstərməli və onu ən əla məziyyətlərlə bəzəməlidir.
Beləliklə,
bundan əvvəlki ayələrdə Fövqəluca Özünün bəzi əzəmətli və kamil sifətlərini insanlara
açıqlayır və bunların sayəsində onlar öz Rəbbini tanıyır və Ona ibadət edir
və var qüvvələrini əsirgəmədən Onun lütüfkarlığını qazanmağa və Onun qəzəbindən
xilas olmağa can atırlar.
ﮍ ﮎ ﮏ ﮐ ﮑ ﮒ ﮓ ﮔ ﮕ ﮖ ﮗ ﮘ ﮙ ﮚ
(64. 5) “Məgər
əvvəllər iman gətirməmiş və əməllərinin nəticəsini dadmışlar haqqında xəbərlər
sizə çatmamışdırmı? Onlara sarsıdıcı iztirablar da hazırlanmışdır”.
Allah
yaddaşlardan bu günədək hələ silinməmiş qədim xalqlar və ötüb keçmiş nəsillər
haqqında xəbər verir. Həqiqəti danışan insanlar rəvayət edirlər ki, Allahın
elçiləri (onlara salam olsun!) onlara Fövqəluca Allahdan haqqı gətirmişdilər,
onlar isə, onu yalan saymışdılar, kafirlikdə inad edirdilər və öz həlakedici
əməllərinin nəticələrini də bu dünyada daddılar. Allah onları yer üzündə
rüsvay etdi və Axirət həyatında isə onlara əzab-əziyyətli cəza
hazırlanmışdır.
ﮛ ﮜ ﮝ ﮞ ﮟ ﮠ ﮡ ﮢ ﮣ ﮤ ﮥﮦ ﮧ ﮨﮩ ﮪ ﮫ ﮬ ﮭ
(64. 6) “Bu, elçilərin onlara aydın ayələrlə gəlmələrinə və onların isə:
“Doğrudanmı insanlar bizi doğru yolla aparacaqlar?” – demələrinə görədir.
Onlar iman gətirmədilər və üz çevirdilər. Allah onlarsız keçindi, axı Allah
– Zəngindir, Həmdəlayiqdir».
Fövqəluca
onları cəzaya və bədbəxtliklərə məruz qoydu, çünki onlar haqq və yalanı təsdiq
edən və onlara aydın möcüzələr nümayiş etdirən elçiləri (onlara salam olsun!)
inkar edirdilər. Onlar özlərini elçilərdən üstün tutur və soruşub deyirdilər:
“Doğrudanmı insanlar bizi doğru yolla aparacaqlar?” Onlar bizdən
yaxşı deyillər, bəs onda niyə Allah bizi deyil, onları seçmişdir?
Cavabında
elçilər (ə) onlara deyirdilər: “Biz də sizin kimi insanlarıq. Lakin
Allah qullarından istədiyinə mərhəmətini əta edir...” (İbrahim, 14/11).
Kafirlər Allahın Öz peyğəmbərlərinə (onlara salam olsun!) lütüfkarlıq göstərməsi
və onları insanlara elçi göndərməsi ilə razılaşmırdılar. Onlar ağaclara və
daşlara ibadət etməyi üstün tuturdular, Allaha ibadət etmirdilər və Ona itaət
etməkdən imtina edirdilər.
Lakin Allah onlarsız da keçinirdi, axı O (Pak və Müqəddəs), Öz
qullarından asılı deyil və onların azğınlığı Ona ziyan vura bilməz. Zəngin və
Həmdəlayiq adları – Onun gözəl adları sırasındadır. O (Pak və Müqəddəs), qətiyyən
heç nəyə möhtac deyil və Onun nitqi, əməlləri və məziyyətləri yalnız təriflənməyə
və həmdə layiqdir.
ﮮ ﮯ ﮰ ﮱ ﯓ ﯔﯕ ﯖ ﯗ ﯘ ﯙ ﯚ ﯛ ﯜ ﯝﯞ ﯟ ﯠ ﯡ ﯢ ﯣ
(64. 7)
“Kafirlər elə zənn edirlər ki, onlar dirildilməyəcəklər. De: “Əksinə, Rəbbimə
and olsun ki, siz mütləq dirildiləcəksiniz, sonra isə sizə nə etdikləriniz
xəbər veriləcəkdir. Bu, Allah üçün asandır».
Allah
bildirir ki, allahsızlar haqqa müqavimət göstərərək, inadkarlıq edirlər,
yalançı iddialar irəli sürürlər və elmdən, haqq Təlimatdan və Səmavi Kitabdan
məhrum olmaları üzündən Qiyamət gününə iman gətirmirlər. Buna görə, Allah
insanların ən yaxşısı olanı – Muhəmməd Peyğəmbərə (ona Allahın salavatı
və salamı olsun!) əmr edir ki, öz Rəbbinin adından istifadə etməklə
and içsin ki, dirilmə labüddür və həmçinin insanların yaramaz əməllərinə və
haqqı danmalarına görə əvəz veriləcəyi də labüddür, çünki bu Allah üçün çətin
deyil. Bu, insanlara olduqca çətin və mümkün olmayan bir şey kimi görünür,
çünki onlar hətta hamısı bir yerə yığılışsalar belə, bir nəfər ölmüş adamı həyata
qaytara bilməzlər. Lakin əgər Fövqəlqüdrətli Allah bir şeyi etmək istədikdə, O
(Pak və Müqəddəs),: “Ol!” – deyən kimi, o da o saat olur.
Fövqəluca buyurur: “Sura üfürən kimi, yalnız Allahın istədiklərindən
başqa, göylərdəkilər və yerdəkilər öləcək. Sonra ona bir daha üfürəndə, hamı
qalxacaq və baxacaqlar” (Zumər, 39/68).
ﯤ ﯥ ﯦ ﯧ ﯨ ﯩﯪ ﯫ ﯬ ﯭ ﯮ ﯯ
(64. 8)
“Allaha, Onun Elçisinə və Bizim nazil etdiyimiz Nura iman gətirin! Allah etdiklərinizdən
xəbərdardır”.
Allah dirilməni
inkar edənləri yalançılıqda ifşa etdikdən sonra, bildirir ki, məhz Qiyamət
gününün inkarı insanları allahsızlığa, Allahın möcüzələrini qəbul etməməyə
sövq edir və O (Pak və Müqəddəs), qullarına həlak olmaqdan və bədbəxtliklərdən
qorunmağın mümkün olduğunu göstərir. Bundan ötrü onlar Allaha, Onun Elçisinə
(ona Allahın salavatı və salamı olsun!) və Onun Kitabına iman gətirməlidirlər.
Fövqəluca Öz
Kitabını Nur adlandırır, çünki yalnız nur zülmətə qarşı dura bilər, Allahın
Quranda nazil etdiyi hökümlər, qanunlar və hekayətlər isə bir məşəl kimi,
cahilliyin qatı qaranlığında insanların yolunu işıqlandırır.
Əgər kimsə
öz həyatında Allahın Kitabından başqa bir təlimə əsaslanarsa, o, ona faydadan
çox zərər, xeyirdən çox şər gətirər. Bundan başqa, bu yalançı təlimlərin bəzilərində
nə xeyir var, nə də fayda, çünki istənilən təlim insanların xeyri üçün o vaxt
yararlı olur ki, o, Allahın elçilərinin (onlara salam olsun!) özləri ilə gətirdiyinə
uyğun gəlmiş olsun.
Allaha, Onun
elçisinə və Onun Kitabına iman gətirən insandan tam qətiyyət, səmimi etiqad
tələb edilir və bu – Rəbbin hökümlərini yerinə yetirməklə, Onun qadağan etdiyi
hər şeydən çəkinməklə nəticələnir. Bunu yadda saxlayın və bilin ki, Allah sizin
nə etdiyinizdən xəbərdardır və sizə bütün xeyirxah və yaramaz əməllərinizin
əvəzini mütləq verəcəkdir.
(64. 9) “Həmin
gün O, sizi Toplanış günü üçün cəmləşdirəcəkdir. Bu, qarşılıqlı aldanış
günü olacaqdır. O, Allaha iman gətirib, xeyirli işlər görənlərin günahlarını
bağışlayacaq və onları çaylar axan Cənnət bağlarına daxil edəcəkdir. Onlar
orada əbədi qalacaqlar. Bu – böyük uğurdur!”
Allahın yaradılışın
başlanğıcından bəri yaşamış şəxslərin hamısını bir yerdə cəm edəcəyi Böyük
Toplanış gününü də unutmayın! Onlar Rəbbin hüzurunda qorxu və dəhşət içində
toplaşacaqlar və O (Pak və Müqəddəs), onların etdikləri bütün işləri onlara
xəbər verəcəkdir.
Həmin gün məxluqların arasında əsil fərq üzə çıxacaqdır. Allah onların
bir qismini Cənnətin uca məqamlarına yüksəldəcək və orada onlara içində cürbəcür
gözəlliklərin və ləzzətlərin dolu olduğu hündür mənzillər[2] və
uca imarətlər[3]
bağışlayacaqdır. Digərləri isə Cəhənnəmin ən aşağı təbəqələrinə -
narahatçılıq, qəm-qüssə və əzab-əziyyətli cəza məskəninə vasil ediləcəklər.
Bütün bunlar – onların maddi dünya həyatında etdikləri və törətdikləri əməllərin
bəhrəsi olacaqdır.
Bu, məxluqlar arasında əsil fərqin aşkar edildiyi qarşılıqlı aldanış
günü olacaqdır. Allah möminlərə, günahkarların məhrum edildiyi, xeyirli
qismət bəxş edəcəkdir və onda günahkarlar biləcəklər ki, onlar yoldan necə
azmışmışlar və indi necə bir zərərə uğramışlar.
Sonra Allah nəyin uğur və səadətin zəmanəti, nəyin isə bədbəxtliyin
və əzab-əziyyətin rəhni olduğunu bildirir. Allah Ona iman gətirən və Rəbbin
nəyə iman gətirməyi əmr etdiyinə şübhə etməyərək, xeyirxahlıq edən, həm fərz,
həm də könüllü ibadət ayinlərini yerinə yetirən, Allah qarşısında və
insanlar qarşısında öz vəzifələrini icra edənin pis əməllərini
bağışlayır. O, çaylar axan Cənnət bağlarına girəcəkdir. Onlarda insanların
arzu etdikləri, baxışlarının valeh olduğu, ürəklərindən keçirdikləri və
könüllərinin istədiyi hər şey vardır. Həqiqətən, bu, bütün istəklərin həddindədir.
ﭑ ﭒ ﭓ ﭔ ﭕ ﭖ ﭗ ﭘ ﭙﭚ ﭛ ﭜ
ﭝ
(64. 10) “O
kəslər ki, iman gətirmədilər və ayələrimizi yalan saydılar, Od məskunları olacaqlar.
Onlar orada əbədi qalacaqlar. Bu qayıdış yeri necə də pisdir!”
Haqqı qəbul etməyən kafirlər, nə Allahın şəriətinə, nə məntiqə, nə
də haqqı təsdiq etmək üçün nazil edilən sübutlara və dəlillərə baxmayaraq,
onu qəbul etməyənlər və ona inadkarlıqla müqavimət göstərənlər Cəhənnəm sakinləri
olacaqlar və orada əbədi olaraq qalacaqlar. Özündə bütün müsibətləri və bəlaları,
bütün iztirabları və əzab-əziyyəti birləşdirən belə sonluq necə də mənhusdur!
ﭞ ﭟ ﭠ ﭡ ﭢ ﭣ ﭤﭥ ﭦ ﭧ ﭨ ﭩ
ﭪﭫ ﭬ ﭭ ﭮ ﭯ ﭰ
(64. 11)
“İstənilən müsibət yalnız Allahın izni ilə baş verir. Allaha
iman gətirənin qəlbini O, doğru yola yönəldir. Allah hər şeyi Biləndir».
İnsana nəsib
olan müsibətlər Allahın izni ilə olur və bu, insanla, onun malı ilə,
övladları ilə, sevdikləri ilə və s. ilə baş verə bilən bütün bəlalara
aiddir. Bu bədbəxtliklər Allahın təyin etdiyi qədərə və taleyə tabedir.
Allah onların barəsində onlar insanların başına gəlməzdən əvvəl bilirdi və Qələmə
onları Mühafizəolunan Kitabında yazmağı əmr etmiş və baş verməsinə icazə
vermişdi, çünki bunu Onun ilahi hikməti tələb edirdi.
Lakin məsələnin
əsas mahiyyəti bu mürəkkəb şəraitdə insanın öz vəzifəsini yerinə yetirməsində
və ya yetirməməsindədir. Əgər o, onu yerinə yetirirsə, onda o, həm bu dünyada,
həm də Axirətdə bol mükafata və gözəl əvəzə layiq görüləcək. Bundan ötrü
insan inanmalıdır ki, bu müsibət onun başına Allahın icazə ilə gəlmişdir və
buna narazılıq göstərməməli və Rəbbin sərəncamına itaət etməlidir. Yalnız belə
olduqda, O (Pak və Müqəddəs), onun qəlbini doğru yola yönəldər və belə insan,
Allaha imandan və Onun köməyindən məhrum olanlardan fərqli olaraq, bundan rahatlıq
tapar və heç bir müsibət onu təşvişə və həyəcana qərq etməz. Bundan başqa,
Allah ona çətinliklər qarşısında dözümlü və layiqincə səbirli olmaqda kömək
göstərər və bunların sayəsində insan tezliklə yer üzündə mükafat alar, Allah
isə onun üçün Qiyamət gününə böyük Mükafat hazırlayar. Bu barədə Fövqəluca
belə buyurur: «...Həqiqətən, səbirlilərə onların mükafatı tamamilə hesabsız
veriləcəkdir” (Zumər, 39/10).
Bütün
bunlardan aydın olur ki, müsibətlər zamanı Allaha layiqincə inanmayanları,
baş verənləri Allahın yazdığı qədəri və tale ilə izah etməyənləri, hər şeyi
yalnız gördüyü səbəblərlə əsaslandırmağa cəhd göstərənləri Allah Öz
yardımından məhrum edir və onların müqəddəratını özlərinə həvalə edir. Əgər
bu baş verərsə, onda insan qorxu və vahimə ilə dolu nəfsinin hakimiyyəti altına
düşəcək və bu zaman hiss etdiyi dəhşət bu dünyada onun cəzası olmaqla yanaşı,
layiqincə səbirlilik göstərmədiyinə görə Axirət həyatında alacağı cəza
haqqında bir xəbərdarlıq olacaqdır.
Fövqəlucanın
«...Allaha iman gətirənin qəlbini O, doğru yola yönəldir...” sözlərini,
müsibətin düçar olduğu möminin rəftarından bəhs edən bu ayənin mətninə uyğun
olaraq, məhz belə şərh etmək lazımdır.
Onun daha geniş baxımdan mənasına gəldikdə isə, bu – Allaha, mələklərə,
Kəramətli Kitablara, elçilərə, Qiyamət gününə, xeyri və şəri ilə qədərə iman
gətirən və sonra da imanının səmimiliyini işləri ilə təsdiq edən hər kəs hər
sahədə: nitqində və əməllərində, biliyində və işlərində Allahın ona doğru
yol göstərməsinə layiqdir.
Allahın
möminlərə əta edəcəyi ən böyük Mükafat da elə budur! Buna görə O (Pak və Müqəddəs),
bildirir ki, həm dünya, həm də Axirət həyatında möminlərə yardım göstərir: “Allah
möminləri dünya həyatında və Axirətdə qəti sözü ilə müdafiə edir...” (İbrahim,
14/27). Onun köməyi – mənəvi dözüm, səbirlilik və sarsılmaz etiqaddır ki,
hətta insanın nəfsi onu azdırmaq istəyəndə belə, bu məziyyətlər onu tərk
etmir. Bax buna görə də kafirlərin və şübhə edənlərin ürəyinə nisbətən
möminlərin ürəyi doğru yola daha çox bağlıdır və sarsıntılar zamanı daha dözümlüdür.
ﭱ ﭲ ﭳ ﭴﭵ ﭶ ﭷ ﭸ ﭹ ﭺ ﭻ ﭼ ﭽ
(64. 12) “Allaha da itaət edin, Elçiyə də itaət edin! Əgər üz çevirsəniz,
bilin ki, Elçimizin işi yalnız açıq-aydın təbliğatdır».
Allahın və
Muhəmməd Peyğəmbərin (ona Allahın salavatı və salamı olsun!)
əmrlərini yerinə yetirin və onların qadağan etdiklərindən çəkinin, çünki
Allaha itaət etmək və Peyğəmbərə (ona Allahın salavatı və salamı olsun!)
tabe olmaq – xoşbəxtliyin və müvəffəqiyyət mənbəyinin əsasıdır.
Əgər siz Allaha və Peyğəmbərə (ona Allahın salavatı və salamı
olsun!) itaətdən üz çevirsəniz, bilin ki, Elçinin (ona Allahın salavatı və
salamı olsun!) vəzifəsi onunla (s.ə.s.) göndərilən təlimi sizə yalnız çatdırmaq
və izah etmək idi. Siz Haqqın barəsində məlumatlandırıldıqdan sonra öz biliksizliyinizə
görə artıq bəraət qazana bilməyəcəksiniz. Peyğəmbər (ona Allahın salavatı və
salamı olsun!) sizi doğru yola gətirə bilməz və sizin taleyinizi o (s.ə.s.)
həll etməyəcəkdir. Siz Allaha və Onun Elçisinə (ona Allahın salavatı və
salamı olsun!) tabe olub-olmamağınıza görə qeybin də, aşkarın da məlum
olduğu Allahın qarşısında cavab verməli olacaqsınız.
ﭾ ﭿ ﮀ ﮁ ﮂﮃ ﮄ ﮅ ﮆ ﮇ ﮈ
(64. 13)
“Allah – Ondan başqa ilah Olmayandır. Qoy möminlər yalnız Allaha təvəkkül
etsinlər».
Yalnız Allah
ibadətə və ilahlığa layiqdir, bütün digər “ilahlar” insanların özləri tərəfindən
uydurulmuşlar. Bax buna görə də insanlar onların qismətinə düşən bütün işlərində
Ona təvəkkül etməlidirlər. Allahdan başqa heç kim onların qarşısında qoyulan
vəzifələrin həllini asanlaşdıra bilməz. Buna görə işdə asanlığa nail olmaq
yalnız Ona təvəkkül etməklə və Onun köməyinə arxalanmaqla mümkündür.
Allaha layiqincə təvəkkül etmək üçün, insan Onun ona mərhəmət göstərəcəyinə
inanmalıdır və Onun köməyinin kifayət qədər olacağına şübhə etməməlidir.
Allahın qulunun imanının gücündən asılı olaraq, onun təvəkkülü güclü və ya
zəif ola bilər.
ﮉﮊﮋﮌﮍﮎ ﮏ ﮐ ﮑ ﮒﮓ ﮔ ﮕ ﮖ ﮗ ﮘ ﮙ ﮚ ﮛ ﮜ ﮝ ﮞ ﮟ ﮠﮡ ﮢ ﮣ
ﮤ ﮥ ﮦ
(64. 14) “Ey
iman gətirənlər! Həqiqətən, zövcələriniz və övladlarınızdan sizə düşmən
ola bilənlər vardır. Onlardan ehtiyat edin, lakin əgər siz iltifat etsəniz,
alicənablıq göstərib, onları bağışlayın, axı Allah Bağışlayandır, Rəhimlidir”.
(64. 15) “Həqiqətən,
malınız və övladlarınız sizin üçün imtahandır. Böyük mükafat yalnız Allahın
dərgahındadır».
Allah bu sözlərlə möminləri öz zövcələri və övladları tərəfindən
fitnəyə salına biləcəkləri barədə xəbərdar edir, çünki onların bəziləri onlara
o mənada düşməndirlər ki, hər kəs insana pislik arzu etsə, onun düşməni olar.
Buna görə möminlər onlara pislik arzu edənlərdən ehtiyat etməlidirlər və
yadda saxlamalıdırlar ki, zövcələrinə və övladlarına məhəbbət insan qəlbinin təbiətinə
daxildir.
Fövqəluca
qullarına izah edir ki, bu məhəbbət bəzən insanı zövcələrinin və
övladlarının, hətta Allahın qanunlarına zidd olan, istəklərini yerinə yetirməyə
sövq edir. Buna görə O (Pak və Müqəddəs), yalnız Onun əmrlərini icra etməyi və,
ilk növbədə, Onun lütüfkarlığına nail olmağa can atmağı əmr etmiş və onlara
buna görə böyük mükafat vəd etmişdir. Bu mükafat onların ən ülvi arzularının
həyata keçməsini təmin edəcək və onların xəyallarında bəslədikləri ən böyük
diləkləri gerçəkləşəcəkdir. Allah bu minvalla möminləri Axirəti bu dünyadan
daha çox sevməyə dəvət edir.
İnsanı
Allaha itaətsizlik etməyə sövq edən zövcələr və övladlar qınanmağa və cəzalandırılmağa
layiq olduqları üçün, Rəbb kişilərə əmr edir ki, onlarla[4]
yumşaq davransınlar və onları bağışlasınlar. Əgər siz onları bağışlasanız,
onlara mərhəmət göstərsəniz və rəhm etsəniz, onda sizin alicənablığınız
sizə böyük fayda verər, axı Allah – Bağışlayandır, Rəhimlidir. Onun verəcəyi
əvəz insanların etdikləri əməllərinə uyğun olacaqdır.
Kim bağışlamağı bacarırsa, Allah da onu bağışlayır. Kim rəhimlidirsə,
Allah da ona rəhm edər. Kim Onun hökümlərini Onun istədiyi kimi icra edir və
insanlara onların istədikləri kimi münasibət bəsləyirsə və onlara fayda
verirsə, o, Onun məhəbbətinə, Onun qullarının məhəbbətinə layiq görülür və
doğru yolda sabitqədəm olur.
ﮧ ﮨ ﮩ ﮪ ﮫ ﮬ ﮭ ﮮ ﮯﮰ ﮱ ﯓ ﯔ ﯕ ﯖ ﯗ ﯘ ﯙ
(64. 16)
“Bacardığınız qədər Allahdan qorxun, dinləyin, itaət edin və öz xeyriniz üçün xərcləyin.
Öz xəsisliyindən qorunanlar – uğur qazananlardır”.
Fövqəluca buyurur ki, Ondan qorxsunlar, Allah qorxusunun mahiyyəti
insanın Onun əmrlərini yerinə yetirməsindən və Onun qadağan etdiklərindən çəkinməsindən
ibarətdir. Bu ayədə Rəbb qullarının təqvalılığını[5]
onların imkanları və bacarıqları ilə bağlayır. Buradan aydın olur ki, əgər
bir insan Allahın hökmünü yerinə yetirməyə qabil deyilsə, onda bu vəzifə
ondan götürülür və əgər o, hökmün bir hissəsini icra edə bilərsə, digər hissəsini
isə etməyi bacarmazsa, onda o, yalnız gücü çatanı yerinə yetirməlidir.
Peyğəmbər (ona Allahın salavatı və salamı olsun!) demişdir:
“Əgər mən sizə bir şeyi yerinə
yetirməyi əmr edirəmsə, gücünüz nə qədər çatırsa, yerinə yetirin”. Bu dini nəzəriyyə özündə saysız-hesabsız şəriət hökümlərini ehtiva
edir.
Ey insanlar!
Allahın moizələrini dinləyin və Ona itaət edin, Onun şəriətini öyrənin
və yerinə yetirin. Bütün işlərinizdə Allaha və Onun Elçisinə (ona Allahın
salavatı və salamı olsun!) tabe olun və öz xatirinizə xərcləyin, yəni, fərz
və könüllü sədəqələr verin və bu xeyirxahlıqlar həm bu, həm də gələcək aləmdə
sizin özünüzə fayda verəcəkdir. Yadda saxlayın ki, yalnız Allahın əmrlərinə
itaət etmək, Onun nəsihətlərinə diqqət yetirmək və nazil etdiyi qanun
önündə müti olmaq sizə fayda gətirər və buna zidd olan hər şey sizin üçün şərə
çevrilər.
Lakin bir
qüsur var ki, o, bir çox insanlara sədəqə paylamaqda və ianə verməkdə
maneçilik törədir və bu qüsurun adı – acgözlükdür. O, insanın qəlbinin fitrətindədir
və buna görə o, var-dövlətə həris olur. Acgöz adam həmişə istəyir ki, varı həmişə
çox olsun və o, varidatdan ayrılmağa hər şeydən çox nifrət edir.
Xəsislik etməyərək,
əmlakını öz faydası üçün xeyirxah məqsədlərə sərf edənlər isə mütləq uğur
qazanacaqlar, çünki onların ən müqəddəs arzuları çin olacaq və onlar dəhşətli
cəzadan xilas ola biləcəklər.
Ehtimal
edilir ki, bu ayədə təkcə sədəqə verməyə xəsislik etməyənlərdən deyil, həm
də Allahın bütün digər hökümlərini yerinə yetirənlərdən bəhs edilir. Axı əgər
insan xəsisdirsə, Allaha itaət etmir və öz əmlakından Allahın ona buyurduğunu
ödərmirsə, onda o, mütləq həm bu dünyada, həm də Axirətdə zərərə düşəcək.
Əgər o səxavətlidirsə, alicənabdırsa, Allahın şəriətinə itaət edirsə və Onun
mərhəmətinə nail olmağa can atırsa, onda o, Rəbbin bir şeyi sevdiyini bildikdə,
o saat onu yerinə yetirir. Belə davranan insan mütləq uğur qazanar və ən
böyük nemət əldə edər.
ﯚ ﯛ ﯜ ﯝ ﯞ ﯟ ﯠ ﯡ ﯢﯣ ﯤ ﯥ
ﯦ ﯧ
(64. 17) “Əgər
siz Allaha gözəl borc versəniz, onda O, onu sizin üçün artırar və sizi
bağışlayar. Allah – Şükrəəvəzverəndir, Həlimdir».
Fövqəluca Öz
qullarını səmimiyyətlə sədəqə verməyə ruhlandırır və
onu gözəl borc adlandırır. Söhbət vicdanlı yolla qazanılmış əmlakdan Allah
xatirinə və Onun bəyəndiyi tərzdə verilən istənilən ianələrdən gedir. Belə
xeyirxahlıqlara görə Allah mükafatı on dəfədən yeddi yüz dəfəyədək və daha
artıq artırır. Bundan başqa səmimiyyətlə verilən ianələrə və sədəqələrə görə O
(Pak və Müqəddəs), insanların günahlarını bağışlayır, çünki məhz xeyirxahlıqlar
və qurbanlıqlar insanın qüsur və nöqsanlarını yuyur. Allah bu barədə belə
deyir: “...Həqiqətən, xeyirli əməllər yaramazlığı uzaqlaşdırır...” (Hud,
11/114).
Allah – Şükrəəvəzverən
və Həlimdir. O (Pak və Müqəddəs), günahkarları
cəzalandırmağa tələsmir və onlara möhlət verir, lakin O (Pak və Müqəddəs),
heç vaxt onları unutmur.
Fövqəluca buyurur:
“Əgər Allah insanları, onların əldə etdiklərinə görə cəzalandırsaydı,
onda O, onun[6]
üstündə bir nəfər belə canlı saxlamazdı, amma O, onlara təyin olunmuş müddətədək
möhlət verir...” (35/45).
Xeyirxah işlər görənlərə isə, Fövqəluca Allah minnətdardır və onlardan
hətta ən cüzi yaxşılıqları da qəbul edir və əvəzində böyük mükafat
bağışlayır. Fövqəluca Onun xatirinə iztirablara və çətinliklərə dözüm
göstərən, yüngül olmayan vəzifələrini layiqincə yerinə yetirən hər kəsə Öz
təşəkkürünü bildirir və bu yolda bir şeydən məhrum olanlara, Allah Öz mərhəməti
sayəsində daha yaxşısını əvəz verir.
ﯨ ﯩ ﯪ ﯫ ﯬ ﯭ
(64. 18)
“Qeybi və aşkarı Bilən – Fövqəlqüdrətlidir, Müdrikdir».
O (Pak və
Müqəddəs), qeybdən və aşkardan xəbərdardır, insanların məlumatı olmadığı
qoşunlar haqqında və həmçinin insanların yer üzündə gördükləri varlıqlar
haqqında hər şeyi bilir. O (Pak və Müqəddəs), – fövqəlqüdrətlidir
və heç kim Ona qalib gələ və ya Onun iradəsinə müqavimət göstərə bilməz. O
(Pak və Müqəddəs), müdrikcəsinə xəlq edir, müdrikliklə hökmdarlıq edir və hər
şeyi öz yerində yerləşdirir.
Комментариев нет:
Отправить комментарий