SURƏSİNİN
ŞƏRHİ
ﭑ ﭒ ﭓ ﭔ
Mərhəmətli və Rəhimli Allahın adı ilə!
(62. 1)
“Göylərdə olanlar da, yerdə olanlar da Hökmdar, Müqəddəs, Fövqəlqüdrətli,
Müdrik Allahı mədh edirlər».
Göylərin və
yerin sakinləri Allahı mədh edir, Ona pərəstiş edir, Ona ibadət edir və Onun
iradəsinə itaət göstərirlər, çünki Onun hakimiyyəti hüdudsuzdur. O (Pak və
Müqəddəs), – göylərin və yerin Ona itaət etdiyi, Kainatın bütün məxluqlarının
Onun qulları olduğu Hökmdardır. O – pakdır və hər hansı qüsurdan uzaqdır.
O – fövqəlqüdrətlidir və bütün varlıqlar Onun hökmü altındadırlar. O –
Müdrikdir, istədiyini xəlq edir və hər şeyi Öz ilahi hikmətinə uyğun olaraq
idarə edir. Allahın bu əzəmətli adları və sifətləri hər bir insandan yalnız tək
Ona ibadət etməyi tələb edir.
(62. 2) “O,
savadsızlara öz aralarından Elçigöndərəndir. O, onlara Onun ayələrini
oxuyur, onları təmizləyir və onlara Kitabı və Hikməti öyrədir, halbuki onlar əvvəllər
açıq-aşkar bir cəhalət içindəydilər».
Allah ərəbləri savadsız adlandırır, çünki onların Səmavi Kitabı yox
idi və heç əvvəlki peyğəmbərlərin (onlara salam olsun!) təlimləri haqqında
biliklər də onlarda qalmamışdı, eynilə, o biliklər digər xalqların da yaddaşında
saxlanmamışdı. Təkcə Kitabı olan insanlar Allahın elçilərinin təbliğ etdiklərinin
müəyyən bir hissəsini qoruyub saxlaya bilmişdilər.
Fövqəluca
Allah onları Özünün ən böyük mərhəməti ilə himayə etmişdir ki, O (Pak və Müqəddəs),
əvvəllər onu heç bir xalqa layiq görməmişdi.
Ərəblər bilik və dindarlıqdan məhrum idilər, dərin azğınlıq zülmətində idilər,
bütlərə, ağaclara və daşlara ibadət edirdilər, vəhşi heyvanlara xas olan qəddarlıqla
fərqlənirdilər, cəngəllik qanunu ilə yaşayırdılar. Bütün bunlar onu göstərir
ki, onlar Allahın peyğəmbərlərinin (onlara salam olsun!) təlimləri haqqında
heç bir təsəvvürə malik deyildilər.
Lakin Allah onlara Elçisini (s.ə.s) göndərdi və onu (s.ə.s) onların
öz arasından seçdi. Onlar onun (s.ə.s) əsil nəcabətini[1] bilirdilər,
onlara onun (s.ə.s) gözəl keyfiyyətləri, doğruçu və etibarlı[2] insan
olması məlum idi. Rəbb ona (s.ə.s) Öz Kitabını nazil etdi, o (s.ə.s) isə
onun ayələrini, yəni, hikmətli sözlərini insanlara oxuyurdu və bu onların qəlbinə
iman bəxş edir və onların gerçəkliyinə şübhə etməyə imkan vermirdi. O (s.ə.s)
onları təmizləyirdi, onları saleh xasiyyətli olmağa çağırmaqla və
qüsurlardan və şərəfsizlikdən çəkindirməklə, xeyirxah əxlaqa malik
olmanın üstünlüyünü onlara izah edirdi. O (s.ə.s) onlara Kitabı və Hikməti,
yəni, Quranı və Sünnəni öyrədirdi və onların qarşısında əcdadlarının və
müasirlərinin malik olduqları böyük biliklər meydanı açırdı.
Bunların sayəsində Muhəmməd Peyğəmbərin (ona Allahın salavatı və
salamı olsun!) səhabələri ən savadlı insanlardan oldular. Bundan başqa,
onlar bütün alimlər və möminlər üçün təqlid ediləsi örnəyə çevrildilər. Peyğəmbərin
(s.ə.s) səhabələrinə həm nəciblikdə, həm dindarlıqda
və həm də haqq yola bağlılıqda bərabər olan yox idi. Onlar haqq yolla nəinki
özləri gedirdilər, onlar həm də öz ardınca başqalarını da aparırdılar. Bunun
sayəsində onlar möminlərin rəhbərləri və dindarların ilhamvericisi
oldular. Fövqəluca Allahın Elçisini (ona Allahın salavatı və salamı
olsun!) məhz onlara göndərməsi, onlar üçün Rəbbin ən böyük neməti oldu.
ﭴ ﭵ ﭶ ﭷ ﭸﭹ ﭺ ﭻ ﭼ ﭽ
(62. 3) “Həmçinin
onlara qovuşmayanlara da. O – Fövqəlqüdrətlidir, Müdrikdir”.
Allahın mərhəməti
nəinki təkcə savadsız ərəblərə və nəinki təkcə insanlara qismət olmuşdu. Ərəblərlə
yanaşı o[3],
islamı sonra qəbul edən və Muhəmməd Peyğəmbərin (ona Allahın
salavatı və salamı olsun!) yaşadığı dövrdə iman gətirənlərə qoşulan Kitab əhlinə
də qismət olmuşdu.
Quran şərhçilərinin bəziləri belə hesab edirdilər ki, “...onlara qovuşmayanlar...”
sözləri Peyğəmbərin (s.ə.s) səhabələrini, zamanla əlaqədar, görməyən
müsəlmanlara aiddir. İkinci bir rəyə görə isə, həmin sözlər – müsəlmanların
bütün sonrakı nəsillərinin saleh səhabələrin qalxdığı pilləyə yüksələ
bilməyəcəklərini ehtiva edir. Gətirdiyimiz hər iki şərh doğrudur. Heç kəs,
Allahın Elçisini (ona Allahın salavatı və salamı
olsun!) görmüş və onunla (s.ə.s) birgə islamı
yaymış şanlı səhabələrin özləri ilə apardıqları yüksək mükafatlara
artıq nail ola bilməz.
(62. 4) “Bu,
Allahın lütfüdür – onu dilədiyi kəsə əta edir. Allah ən böyük lütüf Sahibidir».
Fövqəluca
qullarını ilahi təlimatdan məhrum etməmişdi və onları unutmamışdı və elə bu,
Onun fövqəlqüdrətini və müdrikliyini təsdiq edir. O (Pak və Müqəddəs), bəşəriyyətə
Öz elçilərini (onlara salam olsun!) hökümləri
və qadağaları ilə göndərmiş və onları Özünün seçilmiş nümayəndələri
etmişdir. Bu – Allahın ən böyük lütüfkarlığıdır ki, O (Pak və Müqəddəs),
onunla istədiklərini himayə edir. Bu mərhəmətlə nə sağlamlıq, nə var-dövlət,
nə də digər maddi nemətlər müqayisəyə gəlməz, çünki haqq yola yönəldən nəsihətdən
yaxşı heç nə ola bilməz. Bu Nəsihət Allahın quluna Böyük Uğur əldə etməyə və
Əbədi Səadət qazanmağa imkan verdi.
Əvvəlki ayələrdə
Fövqəluca
Özünün müsəlmanlara bəslədiyi mərhəməti haqqında xəbər verirdi. O (Pak və
Müqəddəs), onlara savadsız Peyğəmbər (s.ə.s) göndərdi və onlara gözəl kefiyyətlər
və üstün məziyyətlər verdi ki, onları bundan sonra da ötüb keçən olmayacaqdır.
O (Pak və Müqəddəs), bir zamanlar savadsız olan bu ümmətə özlərindən əvvəlkiləri
və ardıcıllarını və hətta ilahiyyat sahəsində özlərini ən bilikli sayan Kitab
əhlini də arxada qoymağa imkan yaratdı. Daha sonra Rəbb xəbər verir ki,
Tövratı öyrənmələri və onun hökümlərini rəhbər tutmaları əmr olunmuş yəhudilər
və xristianlar, bunu yerinə yetirmədilər.
ﮊ ﮋ ﮌ ﮍ ﮎ ﮏ ﮐ ﮑ ﮒ ﮓ ﮔﮕ
ﮖ ﮗ ﮘ ﮙ ﮚ ﮛ ﮜﮝ ﮞ ﮟ ﮠ ﮡ ﮢ ﮣ
(62. 5)
“Tövratın həvalə edildiyi xalq və ona riayət etməyənlərin vəziyyəti,
üstündə çoxlu kitab daşıyan eşşəyin vəziyyətinə bənzəyir. Allahın ayələrini
yalan sayanların nümunəsi necə də çirkindir! Allah zalım xalqı doğru yolla
aparmır”.
Kitab əhli
onlara həvalə edilmiş vəzifəni yerinə yetirmirdilər və bunun nəticəsində hər
hansı şərəf və heysiyyətdən məhrum edilmişdilər. Allah onları hikmətli
kitablar yüklənmiş eşşəyə bənzədir. Məgər uzunqulaq belində daşıdığı bu
kitablardan faydalana bilərmi?! Məgər bu ona şərəf gətirərmi?! Məgər onun
qisməti belə ağır yükləri yalnız daşımaq deyilmi?!
Eyni sözü bilikli yəhudilər və xristianlar haqqında da demək olar,
çünki onlar Tövratın hökümlərini yerinə yetirmirlər. Bunlardan ən böyüyü –
Muhəmməd Peyğəmbərin (ona Allahın salavatı və salamı olsun!) ardınca getmək
və onun (s.ə.s) gətirdiyi Kəramətli Qurana iman gətirmək hökmüdür. Tövrata
və onun əhdlərinə belə laqeydlik göstərilməsi onlara ziyandan və ümidsizlikdən
başqa heç nə gətirməz, çünki onlar öz inkarçılıqlarına hər hansı şəkildə qazandıra
biləcəkləri bəraətdən məhrum ediləcəklər. Həqiqətən, belinə kitablar yüklənmiş
uzunqulaq obrazı onlara uyğun gəlir.
Hər biri
Elçinin (ona Allahın salavatı və salamı olsun!) səmimiliyini və onun (s.ə.s)
təliminin gerçəkliyini təsdiq edən Allahın ayələrini inkar edən insanların
müqayisəsi necə də çirkindir! Həqiqətən, Allah fasiqləri, onlar öz
zalımlıqlarında, öz küfürlərində inad etməkdən
əl çəkməyənədək, doğru yolla aparmır və onları əsil fayda verən yollara
da yönəltmir.
(62. 6) “De:
“Ey yəhudiliyə etiqad edənlər! Əgər siz güman edirsəniz ki, yalnız siz
Allahın dostlarısınız, onda əgər haqlısınızsa, özünüzə ölüm diləyin».
Yəhudilərin
zalımlığı və inadkarlığı ondadır ki, onlar öz azğınlıqlarını dərk edirlər,
lakin buna baxmayaraq, inadcıllıqla iddia edirlər ki, təkcə onlar haqq yolun
tərəfdarlarıdır və Allahın sevimli dostlarıdır.
Ey yəhudilər!
Əgər siz doğru deyirsinizsə, doğrudan da haqq yolla gedirsinizsə və Allahın ən
sevimli dostlarısınızsa, onda ölümü arzulayın. Axı bu çox sadə bir işdir. Əgər
siz doğrudan da baxışlarınızın və əməllərinizin haqlı və ədalətli olduğuna əminsinizsə,
onda siz mütləq bu çağırışa cavab verməli və özünüzə ölüm arzu etməlisiniz.
Yox, əgər siz yalan danışırsınızsa, onda siz bunu etməzsiniz.
(62. 7)
“Amma onlar əllərinin hazırladıqlarına görə, bunu heç vaxt arzulamayacaqlar.
Allah zalımları tanıyır”.
Yəhudilər bu
təklifi dinlədikdən sonra, bunu etmədilər və anlatdılar ki, onlar öz
yalançı və nöqsanlı baxışlarından xəbərdardırlar. Bundan başqa, onlar özlərində
həyatla vidalaşmağa nifrət oyadan günahlarından ötrü heç vaxt özlərinə ölüm
arzulamazlar. Həqiqətən, insanların şərəfsizliyi və zalımlığı Allahdan azca
da olsa gizlədilə bilməz.
ﯢ ﯣ ﯤ ﯥ ﯦ ﯧ ﯨ ﯩﯪ ﯫ ﯬ ﯭ ﯮ ﯯ ﯰ ﯱ ﯲ ﯳ ﯴ ﯵ
(62. 8) “De:
“Sizin qaçdığınız ölüm sizi haqlayacaqdır və sonra siz qeybi və aşkarı Bilənin
yanına qayıdacaqsınız və O, sizin nələri törətdiklərinizi sizə xəbər verəcəkdir».
Qoy onlar əllərinin
törətdiklərindən dəhşətə gələrək, özlərinə ölüm arzulamaqdan boyun
qaçırsınlar, qoy onlar ondan var gücləri ilə qaçıb, canlarını qurtarmağa
çalışsınlar – bu onlara onsuz da kömək etməyəcək. Ölüm onları mütləq
yaxalayacaq, çünki bu sonluq Allahın bütün qullarını gözləyir. Onların müddəti
çatanda və ölüm gəldikdə isə, hamısı qeybi və aşkarı Bilən Allahın yanına
qaytarılacaqlar. Bax, onda, Qiyamət günü, O (Pak və Müqəddəs), onlara törətdikləri
hər şey haqqında: ən kiçik və böyük işlərindən, xeyir və şər təşəbbüslərindən
xəbər verəcəkdir.
ﭑ ﭒ ﭓ ﭔ ﭕ ﭖ ﭗ ﭘ ﭙ ﭚ ﭛ
ﭜ ﭝ ﭞ ﭟﭠ ﭡ ﭢ ﭣ ﭤ ﭥ ﭦ ﭧ
(62. 9) “Ey
iman gətirənlər! Cümə günü namaza çağırılanda Allahı zikr etməyə qatılın və
ticarəti dayandırın. Bilin ki, bu, sizin üçün daha xeyirlidir».
Fövqəluca
qullarına əmr edir ki, cümə camaat namazını məsciddə qılsınlar və azan səsini
eşidən[4]
kimi ora tələssinlər. Bu o demək deyildir ki, oraya qaça-qaça getsinlər. Peyğəmbər
(s.ə.s) namaza qaçaraq gəlməyi qadağan etmişdi. Bu hökmün mənası ondadır
ki, möminlər cümə namazının qılınmasında diqqətli olmalı və cümə namazını
qaçırmamağa səy göstərməlidirlər.
Ey müsəlmanlar!
Siz azan verənin səsini eşidən kimi, ticarətinizi dayandırıb, namaz
qılmağa yollanın. Siz bu minvalla, mallarınızı sataraq qazanacağınızdan
da, xeyli çox fayda əldə edərsiniz, çünki mallarınızı satmaqda davam etməklə
və bütün ibadət ayinlərinin ən yaxşısı olan vacib namazlara laqeydlik göstərməklə
bu faydanı əldə etməyə nail ola bilməzsiniz. Əgər siz bilsəydiniz ki, Allahın
mükafatı nə qədər gözəl və daimidir! Əgər siz dünya həyatını dindən üstün tutanın,
kim
olmasından asılı olmayaraq, əsil ziyana uğrayacağını başa düşsəydiniz!
Heyhat, o, uğur qazanacağına ümid bəsləyir... Ticarətin dayandırılmasına gəldikdə
isə, o yalnız namaz qılınan vaxta aiddir və buna görə sonra Fövqəluca belə
buyurur:
ﭨ ﭩ ﭪ ﭫ ﭬ ﭭ ﭮ ﭯ ﭰ ﭱ ﭲ ﭳ ﭴ ﭵ ﭶ ﭷ
(62. 10)
“Namaz qurtardıqdan sonra yer üzünə dağılışın, Allahın mərhəmətini axtarın,
Onu tez-tez xatırlayın, – ola bilsin ki, uğur qazanasınız».
Cümə namazı
başa çatdıqdan sonra yer üzündə əlverişli sövdələşmək və maddi qismətinizin
axtarışı üçün ətrafa yayılın. Ticarətlə məşğuliyyət sizi labüd olaraq Allahı
xatırlamaqdan yayındıracaq və buna görə siz öz Rəbbinizi tez-tez yad edin və
bununla da ruhunuzu möhkəm saxlayın. Allahı ayaq üstə, oturduğunuz və ya
uzandığınız halda, hansı vəziyyətdə olmağınızdan asılı olmayaraq, xatırlayın.
Həqiqətən, Allahı tez-tez yada salma – müvəffəqiyyətin ən mühüm rəhnlərindən
biridir.
ﭸ ﭹ ﭺ ﭻﭼ ﭽ ﭾ ﭿ ﮀﮁ ﮂ ﮃ ﮄ ﮅ ﮆ ﮇ ﮈ ﮉ ﮊﮋ ﮌ ﮍ ﮎ ﮏ
(62. 11) “Onlar ticarət və ya əyləncə gördükdə, dağılışıb onlara can
atdılar və səni, ayaq üstə dayandığın halda, tərk etdilər. De: “Allahın dərgahında
olanlar - əyləncə və ticarətdən yaxşıdır və Allah – Ən Xeyirli Ruziverəndir”.
Bu, cümə
günü, cümə namazından əvvəl Peyğəmbər (ona Allahın salavatı və salamı
olsun!) xütbə verərkən olmuşdu. Camaat Mədinəyə ticarət
karvanı gəldiyini eşidən kimi, Allahın Elçisini (ona Allahın salavatı və salamı
olsun!) minbərdə ayaq üstə olduğu halda qoyaraq, məsciddən
çıxıb, mal almağa başladılar. Onlar yanlış qərar qəbul etdilər və
özlərini çox nalayiq apardılar.
Ey Muhəmməd!
Onlara xəbər ver ki, xeyirxahlığa can atan və Allaha səbirlə ibadət edənlər
üçün hazırlanmış mükafat, yalnız kiçik bir mənfəət gətirəcək və eyni zamanda
insanları Axirət həyatının Böyük təltifindən məhrum edəcək ticarətdən və əyləncədən
daha yaxşıdır. Lakin Allaha səbirlə və zəruri səylə ibadət insanın ruzisini
yer üzündə heç vaxt azaltmaz, çünki Allah – Ən Yaxşı Ruziverəndir. O (Pak və
Müqəddəs), Özünün dindar və mömin qullarına onların hətta heç gözləmədikləri
yerdən nemət verir.
Bu ayələr
bir neçə hökümlərdən ibarətdir:
Camaat
halında cümə namazı müsəlmanlar üçün vacibdir və buna görə onlar ona diqqətlə
yanaşmalı və ona tələsməlidirlər.
Müsəlmanlar
iki hissədən ibarət olan cümə namazından əvvəl xütbə oxunuşunda iştirak etməlidirlər,
çünki Quran şərhçiləri deyirlər ki, “...Allahı zikr etməyə yönəlin” sözlərində
məhz belə xütbələr nəzərdə tutulur.
Cümə
namazından əvvəl azan verilməsi buyurulmuşdur.
Cümə
namazına azan verildikdən sonra ticarət qadağandır, çünki o, möminlərə fərz hökümlərdən
birini yerinə yetirməyə mane olur. Buradan belə bir nəticə çıxarılır ki, istənilən
iş, hətta öz mahiyyəti etibarı ilə icazə verilən olsa da, vacib bir işin
yerinə yetirilməsinə mane olduqda, qadağan edilir.
Rəbb cümə
xütbəsində iştirak etməyi, onu sakitcə dinləməyi buyurmuş və bunu etməyənləri
qınamışdır.
Hər dəfə maddi
mənfəət, əyləncə və ehtiraslar Allahın qulunu özünə cəlb etdikdə,
o xatırlamalıdır ki, Allah Onun lütüfkarlığını axtaranlara və öz alçaq
istəklərinə uymayanlara daha yaxşı əvəz vəd etmişdir.
[1] Yəni, doğuluşundan başlayaraq ta peyğəmbərliyinə qədərki bütün
tarixi, məişəti və özəllikləri nəzərdə tutulur. F.S.
[2] Ərəbcə: Əmin. F.S.
[3] Allahın mərhəməti. F.S.
[4] Bu o demək deyildir ki,
azanı müxtəlif səbəblərə görə eşitməyən müsəlmanlar onun vaxtını bildikləri
halda, azan səsini eşitmədikcə cümə namazına və ya digər namazları qılmaq üçün
məscidə getməməlidir və ya evində namaz qılmamalıdır.F.S.
Комментариев нет:
Отправить комментарий